Llefydd ar gyfer pobl
Pobl sy’n creu lle. Mae dysgu mwy am wneuthuriad y gymuned yn gam pwysig i ddeall beth sydd ei angen a’i eisiau ar bobl.
Gallwch ddysgu mwy am eich cymuned o ddata cyfrifiadau lleol fydd yn rhoi gwybodaeth i chi am ystod eang o bynciau fel oed y preswylwyr, math a maint y teuluoedd, grwpiau ethnig, gweithgarwch economaidd ac iechyd y gymuned yn gyffredinol. Ochr yn ochr â’r wybodaeth sydd ar gael o ddadansoddi data, gallwch hefyd holi pobl am eu cymuned a beth yw ei chryfderau a’i gwendidau yn eu barn nhw.
Mae 62% o bobl Cymru’n cytuno bod gan eu hardal leol ymdeimlad da o gymuned[1]. Gallai hyn ddod o’r croeso a roddir i bobl, pa mor ddiogel y maen nhw’n teimlo neu o’r gwahanol weithgareddau cymdeithasol sydd ar gael. Ond beth y mae pobl yn eich lle’n ei ddweud? Gallwch hefyd ofyn i bobl sut y maen nhw’n teimlo am eu cymuned drwy arolwg aelwydydd. Bydd hyn yn rhoi barn y bobl sy’n byw yn eich lle i gefnogi’r dystiolaeth ddata. Ceisiwch adnabod y rhannau o’r gymuned sydd angen i chi holi eu barn ac efallai’n anodd cysylltu â nhw, neu eu cael i fynychu digwyddiadau. Gall y grwpiau hyn gynnwys plant, oedolion ifanc, grwpiau anabl, lleiafrifoedd ethnig a’r henoed. Ceisiwch eu cynnwys a gofyn iddynt beth a allai eu helpu a’u hannog i gymryd rhan.
[1] Arolwg Cenedlaethol Cymru (Chwarterol) Ionawr - Mawrth 2021
Beth yw demograffeg yr ardal? Sut y mae’n cymharu â’r cyfartalog drwy Gymru?
Sut y mae eich lle’n newid / debygol o newid yn y dyfodol? Ydy o’n tyfu neu ydy pobl yn gadael?
Sut fyddech chi’n disgrifio’r teimlad o gymuned yn eich ardal? Gofynnwch i bobl sut fath o gymuned ydy hi.
Pa gyfran o’r gymuned sy’n siarad Cymraeg?
Sut y mae’r gymuned yn gwasanaethu pobl iau a hŷn?
Pa adeiladau diwylliannol a chrefyddol sydd yno, a pha ddefnydd a wneir ohonynt?
Ydy pawb yn teimlo eu bod yn perthyn i’r gymuned, beth bynnag yw eu hoed, rhywedd, tarddiad ethnig, cred, rhywioldeb neu anabledd?
Pa mor ddiogel ydych chi’n teimlo yn ystod y dydd ac wedi nos? A oes unrhyw bryderon am droseddu? A oes cynllun gwarchod cymdogaeth neu gynllun diogelwch cymunedol?
-
• Tyllwch yn ddyfnach i’r data a chymharu eich lle ag eraill yng Nghymru: Hafan | Deall Lleoedd Cymru
• Edrychwch a oes gan eich lle doiledau cyhoeddus: The Great British Toilet Map
• Pa mor dda y mae’r dref yn perfformio’n economaidd?